Xiaomi ne jahaan kuch din pehle Redmi Note 5 launch kar apne fans ka intezaar khatm kiya, wahin MWC mein Mi MIX 2s ka intezaar badhne laga hai, tezi se upar uth rahi aur saari duniya mein budget smartphones ke liye jaani jaa rahi company ab shayad ek gaming smartphone ke zariye dhamaka karne jaa rahi hai.
Darasal, AnTuTu Benchmark par Blackshark naam ka ek smartphone spot kiya gaya. Is high-end smartphone ka yahaan dekha jaana ye ishara kar raha hai ki Blackshark Technology incorporated naamak company ne is smartphone ko banaaya hai aur Xiaomi ne ismein invest kiya hai.
Blackshark ek game provider company hai jiski website par ek teaser hai jismein ek gaming device ka hint bhi moujood hai. Saath hi iske Weibo account se ye pata chal raha hai ki ye company smartphone bhi manufacture karti hai.
AnTuTu Benchmark par Xiaomi ke is Blackshark smartphone ke jo features nazar aayein hai wo ek premium phone ka hint de rahe hain. Ye ek Android 8.0 Oreo based smartphone hoga jo full HD+ displayke saath aayega aur Qualcomm Snapdragon 845 processor ke saath chalega. Ismein 8GB ki RAM aur 32GB ki flash storage hai.
Is full view display waale smartphone ko AnTuTu par 270680 points ka score mila hai, jo ki Samsung ke upcoming smartphone Galaxy S9 ke AnTuTu score 265267 se bhi thoda upar hai. Halaanki Xiaomi ne is baat ki confirmation nahin di hai ki wo koi gaming smartphone launch karne wala hai ya nahin. Lekin agar aisa hua to RazerPhone ka ye competitor behad damdaar nazar aa raha hai.